輕裝上路

昨天恒指收市升成千點，一口氣將周一的跌幅追回。昨天大清早讀各大報章經濟版，差不多所有股評家都睇淡昨日大市，標題包括「失守升軌、明顯轉淡」、「大市尋底下試2萬7」、「危機四伏淡倉傍身」等。

我在上年年尾前已將長期持有的投資組合清倉，組合內佔七成以上的滙控(005) 雖然至今沒有很大升幅(因我的沽出價近140元)，但我當時卻曾經深信，恒指不能超越2萬點。正所謂牛市莫估「頂」，今次真係估錯不特止，仲要升到我唔信，升穿3萬點。

雖然我在本年中開始以手頭約三成資金再輕裝上路，但因未能把握8月中調整時入多一點中資股，以至今天雖能在調整後的升浪中獲利，但回報率比較指數的升幅，可說是差強人意。

或許有人話馬沙死「熊」一邊頸，如果唔係就發達。但返回一年前，又有多少人有信心恒指會升至3萬點呢？

特別係馬沙這種非常保守的計數佬，無論用我所學的任何估值方法，目前大部分的大型中資股都偏貴。雖然市場能找到多項理由去解釋，為何很多股份能高企於60至70倍，甚至過百倍的巿盈率。

記得每次股災前，都有人說以市盈率去估值已不合時宜，科網股年代有人提倡以Hit Rate去估值，今日有人提倡用PEG，但相信最後又會用返市盈率。如今面對前所未有的大型資金市，還是謹慎一點，在每次指數回落，以三成資金短線持有中資股為上策。

(10月24日刊於《am730》)