責任誰屬

審計署每年都會撰寫報告，揭發資源運用不當的部門。上星期再一次指責旅發局亂花公帑，報道一出，市民無不嘩然。相信好多市民都同馬沙一樣，不明白政府怎樣跟進審計署的指責及建議。

就好似今次主角旅發局，已經被多次批評胡亂花錢，但政府為何容許旅發局一錯再錯呢？

根據審計署長表示，他們的職能只限於查出問題所在，而善後就要交俾其他部門。如果審計署永遠努力查找不足，但政府永遠聽完就算，執行部門永不處理各個大花筒，那麼，最花公帑的可能就是審計署。因為審計署每年花了這麼多人力物力，但報告大家睇下就算。

就以今次旅發局為例，前總幹事未得財政司長同意，由主席越權批准其購買大額保險。事後該主席以當日是被人誤導為理由，將錯誤推得一乾二淨。馬沙諗了幾天，如果呢件事發生在商業機構，追究起來會點呢？

答案顯然易見，必定有人要人頭落地。

在商業機構，犯了如此錯誤，如主席用被人誤導脫身，那麼誤導主席的人，如沒有合理解釋，必定要上身，輕則被炒，重則被告。但話分兩頭，咁重要事項都可以被誤導，年中都不知有幾多小事被誤導。

有如此大意主席，難怪旅發局形同私人遊樂場，高層薪酬可以超越職級頂點，職員又可以在未獲上司批准的情況下先斬後奏到外地公幹，仲要夾啱自己放假旅遊，若果唔係一種慣性，點會有人咁夠膽。

(12月3日刊於《am730》)