四縮

恒指昨天開市時，相信好多股友都同馬沙一樣，被著名網上報價機嚇咗一跳。事緣馬沙開市後不久，望望電腦報價機，機上顯示恒指下跌近600點，但各大藍籌股的股價又顯示正在上升，真是莫名其妙。再比較恒指及期指的報價，即發現恒指及國指報價出現嚴重差距。馬沙即時打開收音機財經台，才能確定恒指正在上升近600點。如果睇住該報價機作出錯誤的買賣決定，真係大件事。所以話，機都唔可以信賴，何況人。

正所謂「贏要谷，輸要縮」，股市最近大上大落，作為散戶，到底應該谷還是縮，真是各有唔同睇法。自從恒指上周二曾經跌穿所謂牛熊分界線，有人話熊來了，又有人話牛未死。

個個散戶都祈望有明燈指路，任總第一個出來叫大家小心，但就拒絕回應後市展望，仲叫大家去問四、五、六叔，都算幽默。等咗幾日，賭王第一個公開發言，繼續其義無反顧大好友的言論，一注獨贏，過年前睇3萬點。

至於人稱香港股神的四叔，股民等了又等，昨天終於開聲。與以往有所不同，四叔今次表示自己不是名牌股神，只是冒牌股神。又再度將過年前見3萬點的幻想，推後至首季可升至27,000至30,000點。一路追隨香港股神追貨的散戶們，不知刻下心情如何。

馬沙一向都話，要在風高浪急的股海暢泳，除了自己外，邊個都信唔過。

不過話時話，四叔今次開始「縮」，後市會否又戲劇性向上，幽我們的香港股神一默呢？

(1月30日刊於《am730》)