麻木不仁

在過去一年，政府一眾高層官員，幾乎在所有事故發生後，向市民解畫的表現都令人感到失望。市民不禁會問，究竟呢班官員本身欠缺危機管理意識，還是因為但求自保，所以麻木不仁，背着良心講大話。正所謂權力令人腐敗，香港政府的高官，正正在彰顯「越高層、越低能」。

為求逃避責任，講嘢既不經大腦，且毫無常識可言的文化，現在更入侵各個服務機構。要數不負責任方面，醫管局屬下多間醫院的總監，在每次發生醫療事故時，就最出神入化。

還記得多月前某醫院，有病人不幸被錯誤割去一邊乳房。馬沙好記得當日在電視上，收看醫院就該醫療事故的新聞發布會，某名醫生竟可當住眾人面前說:「錯割病人乳房，係一個壞消息，但可喜的是證實咗病人並無患上乳癌」。不知呢位仁兄是否覺得自己好幽默，但如果懂得將心比己，想想若病人係自己至親，當知以上一番說話實在一啲都唔好笑。

日前明愛事件，病人已經不幸死亡。先不管誰對誰錯，那個醫院總監馬學章，竟然夠膽面對公眾，大大聲話明愛服務已經做得好好，員工已經依足指引。

人家到達醫院門前，醫院見死不救都算，還要說死者兒子不幸，以為去到懷明樓(事故地點)門口，已經到咗醫院。即係暗示最錯就係死者兒子，無直接送父親到適當地點，去錯地方又唔識自己打999。講得出呢番麻木不仁的說話，已經無資格當明愛總監，唔好影衰晒其他好醫生。

(2008年12月23日刊於《am730》)