上周五，老友致電來話當晚有個免費講座，問馬沙有冇興趣去聽。當馬沙知道講者係會計界鼎鼎大名的Paul Pacter後，即時答應。
不知講座因免費又有CPD，還是Paul Pacter大名的關係，馬沙跟老友在講座開始前到達講座場地時幾乎坐無虛席，好不容易才找到兩個座位。
講座7時開始，歷時個半小時，但不知何解，很多與會的會計師接近8時才到達會場，不知他們平日去睇戲時，是否都喜愛在電影播放超過一半時才入場呢？
雖然講座免費，遲到並無金錢損失，但大家話晒專業人士，為尊重講者，應該準時到達。
可能Paul Pacter太出名之故,講座開始半小時後座位已滿，講座搞手要不斷加摺椅，後期還出現企位奇景，阿Paul應該幾開心。但馬沙其後卻發現有幾個空位被霸佔住，當中有女士為其心愛的名牌手袋安排座位，亦有男士為其接近8時才能到達的女性友人留位，馬沙真替當晚罰企的會計師不值。
香港人做事分秒必爭，當晚又正值周五，很多人或要趕下場。講座接近完結時，開始有電話聲響起，本來忘記關電話是情有可原，不接就是。可是坐在馬沙後排有人接電話，仲講成分鐘。佢老哥以為自己好細聲，但當中對話馬沙全部清楚接收。
最失禮係阿Paul還未正式講多謝大家到場及拜拜，一班會計師已好似走難一般趕住離開，嚇到阿Paul眼都凸。
(9月10日刊於《am730》)
8 則留言:
我見到的一幕更無奈: 當 Dr Pacter 離開時, 他在七樓等電梯, 電梯門開了, 一班會計師蜂擁而入, 完全沒有人理會 Dr Pacter, 其實大家應該禮讓 Dr Pacter 先用電梯, 始終人家是嘉賓, 年齡和輩份亦高過我們, 唉, 香港會計師冇大冇細, 真是羞家!
唔好話會計師,根本依家好多人都唔識専重人。
嗰晚我都有去,走嗰陣D人真係好似走難,失禮死人。
至於"有男士為其接近8時才能到達的女性友人留位",我就坐正條友仔隔離。中段曾有一名遲到女士想走去坐,當時以經有人要企,條友仔竟然仲夠膽話個位有人,真係冇修養。
最好笑係嗰條女性友人到場時,主持人示意叫佢等等,想開張摺椅比佢坐,佢理都唔理主持人,唉...主持人話哂都係議員....佢獨自走去條友仔到坐,幾咁唔知醜。
不止會計師,香港人的修養正下降中.
沙沙，
真系呀，專業資格，同個人修養，品味識見，絕對無掛鉤。
Too bad 好多人都唔理解上同接受上面的事實，所以份外有驚喜。
唔好意思我遲到添！
比人地講晒我想講既野
特別同意大師所言
另外d人會報名應該係貪個d免費既CPD分先至咁多人報名同埋遲到早退
至於講員究竟係大名鼎鼎定無名小卒
佢地應該完全唔知道或者唔care
易亦,
就連搞手譚香文議員事後給我如此電郵回應:
"I read your article and was not very comfortable with the manner from our professional friends. I will perhaps remind them not to use the phone and not to occupy the seat for their friends."
唉！作為一群專業人士
連呢小小既manner都要人提的話...嘿嘿
不過to be fair係香港呢d咁既人大有人在
我係日本搭車d人講電話細聲不特止
仲好怕影響他人咁再用手按住同好快講完
中國傳統文化同禮貌
係我地呢一代已經不復在
好似國寶咁要去人地既地方先搵得返喇
發佈留言