星期一, 1月 14, 2008

再談樓市

馬沙12月尾及年頭都寫過近月樓市情況,陪伴老友睇樓近兩個月,深深感受到樓市急升的氣氛。根據中原指數,上年樓價整體上升24%。而單單第四季便佔去升幅17%。

馬沙之前講過,各大藍籌屋苑已經大幅上升,甚至出現缺盤情況。馬沙與多名地產經紀吹水,他們大致睇法一致,表示很多賣家都非常睇好後市,所以十分惜貨,大部分更封盤等待過年後再升。於是潛在買家根本沒有選擇。就像馬沙急需搵樓的老友,面對兩個選擇:一是在沒有多大選擇的情況下追貨,二是現時不買,等待過年後各樓盤解封,但就要面對樓價再次上升風險。由於老友認為樓價再升就可能不夠首期,所以唯有立即入市。

觀乎近日市況,樓價升幅的確有點過急,這一點可從各大藍籌屋苑都出現估不足價可知一二。不過,藍籌屋苑近日的租務市場似乎在不斷確認樓價的升幅。就以東九龍港鐵上蓋物業滙景花園為例,一個680呎的細單位,上年4月份的市值租金為$8,500元,但本周就升至$12,000元,升幅近五成。

目前每100萬元20年期按揭貸款的還款額為約$6,000元,利率今月有望跟隨美國再減半厘,租金又面對因樓價上升而大幅上調。除非美國次按問題惡化至拖累香港經濟,否則今年樓價再上升兩成亦非沒有可能。如正租樓者的租約快將完結,有足夠首期及還款能力,不妨好好考慮置業安居。

(1月14日刊於《am730》)

4 則留言:

中產管數男 說...

個市會唔會又係"狼來了"?

Eric 說...

我朋友剛用高市價差不多2成黎買左層樓, 我話佢做乜咁衝動,但可能半年後佢賺到笑...

VC 說...

買樓自住=保證租出又免稅的物業投資,今日而言值得做。

大口仔 說...

作為銀行佬,我都幾肯定2008年港美都會減息1厘以上,即到時供樓利息會去到2.25%左右。租金有實質升幅去支持樓價,所以2008-2009年呢個浪係好實在的。

有意買樓自住人士,計得掂條數供得起就盡快決定喇,如果供樓,要小心計你自己既實質回報,唔好信地產用租金X12個月除樓價,錯的....