撈底兵團

港股昨天繼續下跌，曾一度跌穿26,000點，收市險收於其上。即月期指更是多日來首次以高水收市，是見底回升還是走勢陷阱，今天自有分解。大市上落幅度驚人，高位回落已近6千點，對於持有大量現金的投資者而言，想當然是樂事。

自從恒指由8月大升12,000多點以來，幾乎人人大賺，報章不停吹噓街坊股神誕生的事跡。但隨住本月大波動式調整，相信好多散戶開始損手。昨天有報道指一名小股民疑因近日投資失利，走去跳橋，炒股炒到險些送命，你話幾唔抵。其實目前如此大上大落，小投資者真係要好小心自己投入的資金，切勿過度投資，更加不可借貸。就算好有信心撈底，都應該以實力股為目標，因為大市若見底回升，實力股必定行先。至於各類衍生工具，大家都係少掂為妙。千萬不要以為用刀仔好易鋸大樹，現實是10把刀仔9把斷。

馬沙根據自己早前定下的目標，已於早前跌穿27,000點時投入四分一資金買入五隻中資金融股。雖然昨天已再跌近千點，但仍活得安心。如恒指未來真的要下試100天平均線25,375點，我會毫不考慮再投入另外五成資金。

值得參考的是香港股神四叔昨晚再露面，表示大市已經見底，自己亦已於昨天正式開始入市增持。仲話維持之前年底見3萬點咁話。不過馬沙比較想知四叔高位曾否沽貨，因為次次入貨大聲講，出貨唔出聲的話，散戶好難跟。

(11月23日刊於《am730》)